អ្នកនាំពាក្យក្រសួងការពារជាតិ៖ ការបន្តផ្សាយចោទប្រកាន់លើរាជរដ្ឋាភិបាលថា អនុញ្ញាតឲ្យចិនដាក់មូលដ្ឋានទ័ពក្នុងខេត្តកោះកុង ជាចេតនានយោបាយទុច្ចរិតធ្វើឱ្យពិភពលោក ភាន់ច្រឡំចំពោះកម្ពុជា និងប៉ុនប៉ងរំខានដល់ការអភិវឌ្ឍន៍

ភ្នំពេញ៖ លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ នៅល្ងាចថ្ងៃទី១១ ខែឧសភា ឆ្នាំ២០១៩ បានបង្ហោះសារលើផេកផ្លូវការរបស់លោកដោយបានចាត់ ទុកការបន្តផ្សាយចោទប្រកាន់មកលើរាជរដ្ឋាភិបាលកម្ពុជាថា អនុញ្ញាតឲ្យចិនដាក់មូលដ្ឋានទ័ពក្នុងខេត្តកោះកុង គឺជា ចេតនានយោបាយទុច្ចរិតធ្វើឱ្យពិភពលោកភាន់ច្រឡំចំពោះកម្ពុជា និងប៉ុនប៉ងរំខានដល់ការអភិវឌ្ឍន៍ ខណៈប្រមុខថ្នាក់ដឹកនាំធ្លាប់បានបញ្ជាក់ជំហរយ៉ាងច្បាស់រួចហើយ។

លោកនាយឧត្តមសេនីយ៍ ឈុំ សុជាត បានបង្ហោះសារលើ បណ្តាញសង្គមហ្វេសប៊ុកមានខ្លឹមសារដូច្នោះថា «កាលពីថ្ងៃទី ខែឧសភា ឆ្នាំ២០១៩ កន្លងទៅនេះ មានគេហទំព័រអនឡាញបរទេសមួយឈ្មោះ War On The Rocks បាន ព្យាយាមផ្សព្វផ្សាយចោទប្រកាន់មួលបង្កាច់មកលើ រាជរដ្ឋាភិបាលកម្ពុជាថា អនុញ្ញាតឲ្យប្រទេសចិន ដាក់មូលដ្ឋានទ័ពនៅក្នុងខេត្តកោះកុង បើទោះបីជា រាជរដ្ឋាភិបាលកម្ពុជា បានបញ្ជាក់យ៉ាងច្បាស់លាស់ ដោយមានរដ្ឋធម្មនុញ្ញជាច្បាប់កំពូលប្រទេសមកសំអាង យ៉ាងណាក៏ដោយ។ ការផ្សព្វផ្សាយលាបពណ៌យ៉ាងគឃ្លើន របស់គេហទំព័រនោះ គឺជាចេតនានយោបាយទុច្ចរិតធ្វើឱ្យពិភពលោកមាន ការភាន់ច្រឡំចំពោះប្រទេសកម្ពុជា ព្រមទាំងប៉ុនប៉ងរំខាន ដល់ការអភិវឌ្ឍរបស់ប្រទេស ក្នុងសហការពីវិនិយោគិន បរទេស និងធ្វើឱ្យប៉ះពាល់ដល់ភ្ញៀវទេសចរ ដែលនឹង មកកាន់ប្រទេសកម្ពុជាកាន់តែច្រើន នាពេលខាងមុខ។

ពាក់ព័ន្ធនឹងមូលដ្ឋានទ័ពបរទេសនេះ, សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ធ្លាប់បានបញ្ជាក់ជំហរ យ៉ាងច្បាស់រួចហើយថា រាជរដ្ឋាភិបាលកម្ពុជា មិនអនុញ្ញាតឲ្យមានមូលដ្ឋានទ័ពបរទេស នៅលើទឹកដីកម្ពុជានោះឡើយ ហើយ សម្តេចតេជោនាយករដ្ឋមន្រ្តី ក៏បានប្រកាសទៀតថា កម្ពុជាក៏មិនកែប្រែរដ្ឋធម្មនុញ្ញ ដើម្បីអនុញ្ញាតឱ្យមានមូលដ្ឋានទ័ពបរទេស ឬបញ្ជូនយោធាកម្ពុជាទៅក្រៅប្រទេស ក្រៅពីបេសកកម្មជាមួយ អង្គការសហប្រជាជាតិផងដែរ។

គម្រោង អភិវឌ្ឍន៍តំបន់វិស្សមកាលទេសចរណ៍តារាសាគរ នៅក្នុងខេត្តកោះកុង ដែលវិនិយោគទុនរាប់ពាន់លានដុល្លារ ដោយក្រុមហ៊ុនចិន គឺជាការរួមចំណែកលើកកម្ពស់ និងអភិវឌ្ឍវិស័យទេសចរណ៍ សេដ្ឋកិច្ច និងពាណិជ្ជកម្ម នៅក្នុងប្រទេសកម្ពុជា។ ប្រជាជនកម្ពុជា ពិតជាត្រេកអរណាស់ ដែលវិនិយោគិនចិន បានជឿជាក់លើស្ថិរភាពនយោបាយ មកបណ្តាក់ទុនរកស៊ី នៅក្នុងប្រទេសខ្លួន ជាមួយគ្នានេះ ប្រជាជនខ្មែរ ក៏ស្វាគមន៍ រាល់ការវិនិយោគពីប្រទេសផ្សេងៗទៀតផងដែរ»៕